賢妻良母訓練班 - 日式餃子

話說我去日本生活前，係完全唔會入廚的，一人家庭跟本就冇煮食爐 (!) 一係就去阿媽屋企食，一係就出去食，再唔係就寧願唔食(!)(!)

黎到之後一來外食都比較貴 (嘩，搵港紙的我要在這裡過HKD 1 = JPY 8.5 的生活很不易呀，我又唔係黎援交)，二來有個廚房有齊基本用具，三來(重點)係我無聊，就開始賢妻良母訓練班。

要知道現在的女生唔單止要顧住個樣，仲要醒醒目目，正所謂入得廚房出得廳堂嘛 (當然，我明白男士們會認為可以上得床並且技巧了得會更好~) (又，我覺得自己都ok 囉...)(講左去邊?!)

作為地獄廚神的三妹今日習作 - 日式餃子

小BLAH 叫我upload recipe，其實冇咩特別的recipe啊，說句實話，我這裡真係只係有個廚房有齊基本用具，日本嘛，調味料確係乏味，而且無論叫什麼名字，唔知點解味道都大同小異。你要像小BLAH用九層塔、魚露，蒜粉，檸檬楜椒鹽， parsley flakes 嗎?? 請找個達人告訴我大阪哪兒有...我有的，只係日式豉油，麻油，鹽，豆粉和麵豉湯的那種麵豉而已。

講返個餃子，recipe 如下:

材料 (20枚份 - 一人份):
餃子皮 (一包30片) + 豬肉一碗 + 蝦 (成本所限，雪藏的)約8隻 + 大蒜3條 + 椰菜少少

做法:
1. 豬肉切碎 (我作的。當然係買免治的。)混入醃料日式豉油同少少麻油醃好, 備用
2. 蝦 & 大蒜 & 椰菜切碎並混入肉碎中
3. 攪拌到各材料互相交融 (!)
4. 包餃，用清水掃過餃子皮封實，餡料不宜過多 (呢句抄的)
5. 事成後可以煎or 水煮都得
6. 煎的話要先煎香餃子底，硬身後加少少水，"cup" 蓋蒸約3-4 分鐘
7. 要配日式的餃子汁，做法: 麻油 + 日式豉油 + 蘋果酢 (借的!)

p.s.
a. 大蒜 & 椰菜不能太濕
b. 大蒜 & 椰菜可以換成各種菜 (像灣仔碼頭)
c. citysuper / sogo 有現成的日式的餃子汁 (個人覺得"味千"那種最好味，唔知咩牌子呢)
d. 我的材料份量不能盡信，我只係隨心的 (!)(!)(!) 不能量度，也沒有單位
e. 我說的大蒜是綠色一條像蔥的那種，不是白色一粒的呀